कराड यांना लॉटरी
भाजप प्रदेश उपाध्यक्ष डॉक्टर भागवत कराड यांना अचानक राज्यसभेची लॉटरी लागली आहे. राज्यातून बलाढ्य नेत्यांना बाजूला सारत पक्षाने थेट डॉ.कराड यांना संधी दिल्याने आश्चर्य व्यक्त केले जात आहे. मात्र या पाठीमागे निष्ठावंतांना न्याय देण्याची पक्षाची भूमिका असल्याचा संदेश कार्यकर्त्यांना देण्यात आला आहे. विशेषतः मराठवाड्यात पक्ष बळकटीकरणासाठी याचा मोठा वापर होईल, असा दावा भाजप नेते करीत आहेत. जुन्या कार्यकर्त्यांमध्ये पुन्हा पक्षाबद्दल विश्वास निर्माण व्हावा असा प्रयत्न भाजपकडून करण्यात येत आहे. त्याचबरोबर नाराज वंजारी समाजालाही चुचकारण्याचा करण्याचा प्रयत्न डॉक्टर कराड यांच्या उमेदवारीतुन झाल्याचे दिसते. खैरे यांचा त्रागा
 लोकसभा निवडणुकीतील पराभवानंतर माजी खासदार चंद्रकांत खैरे पक्षात एकाकी पडल्याचे चित्र आहे. गेल्या 40 वर्षांपासून पक्षाचे निष्ठेने काम करणार्‍या खैरे यांच्या एका पराभवानंतर बदललेली परिस्थिती शिवसेनेसाठी चिंताजनक बनली. राज्यसभेसाठी खैरे गुडघ्याला बाशिंग बांधून होते. मात्र ऐनवेळी काँग्रेसमधून पक्षात आलेल्या प्रियंका चतुर्वेदी यांना पक्षाने राज्यसभेचे उमेदवारी दिली. त्यामुळे निष्ठावंतांवर अन्याय झाल्याची भावना पक्षात पसरली आहे. खैरे यांनी त्रागा व्यक्त करीत पक्षाच्या भूमिकेवर  प्रश्नचिन्ह उपस्थित केले. पक्षाने आपली कदर केली नाही, अशी भावना त्यांनी बोलून दाखविली. खैरेंना डावलल्याने जिल्ह्यातील शिवसैनिकांतही नाराजीचा सूर उमटत आहे. एकीकडे भाजप निष्ठावंतांना संधी देत असताना शिवसेनेत मात्र आरामाची चलती कार्यकर्त्यांना अस्वस्थ करणारी आहे.